Frú Vigdís sagðist hafa tekið ákvörðun sína fyrir löngu og starfsfólk hennar og trúnaðarvinir hefðu vitað um hana lengi. Aðspurð hvað hefði ráðið þessari ákvörðun, sagði forseti: „Ég lít svo á að ég hafi unnið þessari þjóð af heilum hug og heilindum í þessi ár. Ég hef þokað nokkuð áfram þeim málum, sem mér voru efst í huga í upphafi kjörtímabils, og ég er enn á góðum járnum, svo mig langar kannski til þess að vinna að öðrum verkefnum líka." Þar nefndi forseti meðal annars áhuga sinn á margmiðlun og nýtingu hennar til góðs fyrir þjóðina.
Gárungarnir (m.a. sá sem ég bý með) hlógu að áætlunum Vigdísar á margmiðlunarsviðinu. Fannst þetta fyndið tilhugsunar - gamli forsetinn sem fram að þessu hafði aðallega verið að gróðursetja birkiplöntur og skrifa formála í viðhafnarbækur ætlaði kannski að fara að moggablogga? (Moggabloggið var vissulega ekki til á þeim tíma, en þetta er fyndnara svona)
Eins og allir vita er hún Vigdís okkar sérlegur verndari íslenskrar tungu (nenni ekki að gúggla hvort hún sé það á pappírunum, en hún er það allavega í mínum huga).
Að þessu sögðu er ekki skrýtið að mér verði hugsað til Frú Vigdísar þegar ég reyni að horfa á hið ömurlega vefsjónvarp RÚV, ýmist hljóðlaust, myndlaust nema hvort tveggja sé, hlaða niður streymisskjölum sem tekur yfirleitt tvöfaldan þann tíma sem tekur að hlusta/horfa og RÚV auglýsir á sama tíma eftir málfarsráðunauti. Hún væri rétt kona á réttum stað.
